.
طريقه عمل رده تلقائي على ماسنجر الفيسبوك من خلالn8n
احنا النهاردة هنتكلم عن موضوع مهم جدًا لمستخدمين الفيسبوك العاديين اللي عندهم صفحات وعايزين يربطوا المسينجر بتاع الصفحة ببرنامج الاوتوميشنN8N. الموضوع بكل سهوله هو ازاي تعمل رد تلقائي على الرسائل اللي بتجيلك على المسينجر بالبلدي كده زي انصر ماشين من غير ما تفتحه كل شوية. الشرح هيكون بسيط من غير اي تعقيد وتكون اي حد ممكن ينفذ الشرح ده ببساطه من خلال هذه المقاله او من خلال الفيديو اللي هيكون اخر المقاله شرح نظري وعملي في نفس الوقت يعني تقدر تشوف وتطبق عشان العمليه تبقى ناجحه 100%
 |
| طريقه عمل رده تلقائي على ماسنجر الفيسبوك من خلالn8n |
ايه هو الرد التلقائي على ماسنجر الفيسبوك من خلالn8n؟
خلينا الأول نفهم الصورة كاملة. انا عايزك تتخيل معايا الوظيفة أو الـ workflow ازاي حتشتغل. بالطريقه سليمه من غير ما نلخبط في اي اعدادات الشخص هيدخل على صفحتك على الفيسبوك ويكتب رسالة. الرسالة دي هتوصل لبرنامج لـ N8N عن طريق حاجة اسمها webhook. الرسالة دي حتروح لحاجة اسمها AI agent اللي احنا تكلمنا عنها قبل كده، وهو بيتكون من الجزء الرئيسي اللي هو الدماغ سواءً كانت Gemini أو GPT وكمان جزء الذاكرة الميموري. بعد ما الـ AI agent ياخد الرسالة ويحلل السؤال ويجهز الرد، الرد ده حيتبعت تاني للمسينجر عشان يوصل للشخص اللي سأل. فدي الفكرة المقصود تطبيقها بكل بساطه
مرحله تطبيق عمليه الرد الاوتوماتيكي عن طريق اوتوميشنn8n
طيب دلوقتي عايزين نطبق الكلام ده على أرض الواقع خطوة بخطوة ومن غير ما نفوت اي خطوه لان اي خطوه هتتم غلط العمليه كلها هتفشل. أول حاجة هنبدأ بيها هي ربط المسينجر نفسه ب N8N. علشان نعمل كده احنا محتاجين حاجة اسمها webhook node. احنا عايزين trigger أو بداية التشغيل تبقى هي استقبال رسالة من المسينجر. لكن للأسف N8N مفيش فيه trigger node جاهز للمسينجر. الحل هنا إننا نستخدم webhook node. الـ webhook ده عبارة عن رابط هيبقى وسيط بين المسينجر و N8N. أي رسالة جديدة حتجيلك، المسينجر حيبعت إشعار notification للرابط ده اللي هو موجود في N8N. وبكده احنا استقبلنا الداتا.
هنضيف الـ webhook node في الـ workflow. هتلاقي فيه Test URL و Production URL. احنا هنسخ الـ Test URL علشان نستخدمه في مرحلة البناء والتجربة.
طيب دلوقتي نروح نعمل الحاجة التانية اللي هي إننا نجهز الإعدادات من ناحية الفيسبوك. هنروح على موقع Meta for Developers. هنعمل تسجيل دخول بحساب الفيسبوك بتاع الصفحة. هنبدأ نعمل Create New App. هنختار نوع App اسمه Business. هنا فيه خطوة مهمة جدًا قوي. الموقع حيطلب منك Privacy Policy URL. لو معندكش موقع، تقدر تستخدم مواقع مجانية على الإنترنت تقدم لك خدمة generate لـ privacy policy وتديها أي اسم وتديها إيميلك وهي هتديك لينك جاهز. هنسخ اللينك ده ونحطه في الحقل المطلوب في صفحة إعدادات الـ App تحت قسم Basic.
👇
بعد ما نحفظ التغييرات، هنروح على إعدادات المسينجر API اللي جوة الـ App. هنلاقي فيها خيار Configure Webhooks. هنضيف الـ Callback URL اللي احنا نسخناه من N8N. وهنكتب كلمة سر نختارها بنفسنا في حقل Verify Token، زي ما نقول messenger_test. لما نحاول نعمل Verify and Save، حيعطينا خطأ. طبيعي. ليه؟ لأن الفيسبوك عايز يتأكد إن الرابط ده بتاعنا فعلاً ومش لأي حد تاني. هيبعت لينا رقم عشوائي اسمه hub.challenge.
👇
فلازم نثبت لفيسبوك إن الرابط بتاعنا. هنروح تاني لـ N8N ونضيف نود جديدة اسمها Respond to Webhook. مهمة النود دي إنها ترد على طلب الفيسبوك وتعيدله نفس الرقم العشوائي اللي هو أرسله. هنربط الـ Webhook node بالـ Respond to Webhook node. كمان مهم في إعدادات الـ Webhook node نفسها نفعّل خيار Allow multiple HTTP messages ونختار GET و POST. دلوقتي نرجع تاني لموقع Meta ونعمل Verify and Save. الموضوع هيكمل بنجاح.
👇
الخطوة الجاية هي إننا نربط الصفحة نفسها. هنختار صفحتنا من القائمة وندوس Add Subscription. هنختار الأحداث اللي عايزين نتتبعها، زي messages. ونؤكد. بعد كده فيه حاجة مهمة جدًا، هندوس على Generate Token. التوكن اللي حيظهر ده، هنسحبه ونحتفظ بيه في مكان آمن، احنا حنحتاجه بعد كده.
👇
كده خلصنا ربط المسينجر ب N8N. دلوقتي نيجي للجزء التاني، وهو بناء الـ AI Agent اللي حيرد على الرسائل. هنضيف AI Agent node في الـ workflow. الـ Agent عشان يشتغل محتاج جزءين أساسيين. الجزء الأول هو Chat Model، يعني النموذج اللي حيتعلم منه ويجيب الرد. احنا ممكن نستخدم OpenAI Chat Model. لو هتستخدم OpenAI، هتحتاج API Key. وده بيكون من موقع platform.openai.com وهو مش مجاني، مدفوع. هنروح هناك ونعمل Create New Secret Key. هناخد الكي ونحطه في Credentials في N8N. وهنحدد الموديل اللي عايزينه، زي gpt-4. الجزء التاني اللي محتاجينه هو الذاكرة، وهنضيف نود اسمها Simple Memory. ده علشان الـ Agent يتذكر المحادثة مع كل مستخدم.
👇
هنروح لإعدادات الـ AI Agent node. في حقل Source for Prompt هنختار Define Below. في حقل Text هنحط المتغير اللي هيجيلنا من المسينجر، وهو نص رسالة المستخدم. وهنجيبها من الـ Webhook node. مهم قوي إننا نضيف System Message في Options. دي التعليمات اللي بنحطها للـ AI عشان يفهم الدور المطلوب منه ازاي يرد.
👇
الجزء التالت والأخير هو إننا نأخذ الرد اللي جه من الـ AI Agent ونبعته تاني للمسينجر. علشان نعمل كده، هنستخدم HTTP Request node. هنضيف النود دي. هيبقى فيها Method، هنغيرها من GET لـ POST. علشان نعرف نملى بياناتها صح، محتاجين كود خاص من وثائق الفيسبوك اسمه cURL. هناخده من موقع developers.facebook.com تحت قسم Messenger Platform في جزء Send a Message. هننسخ الكود ونروح في الـ HTTP Request node ندوس على Import cURL ونلصقه. هيظهر لينا الحقول.
هنتأكد إن الـ URL فيه الـ Page ID الصح. وهنحط الـ Access Token اللي حفظناه من زمان في المكان المخصص له.
👇
الجزء الأهم هو الـ JSON Body. هنشيل النص الافتراضي اللي هو hello world. وهنحط مكانه الهيكل الصح. الهيكل هيبقى فيه جزء اسمه recipient، وجواها id. وهنا هنحط الـ sender id اللي جايلي من الشخص اللي بعت الرسالة. والجزء التاني اسمه message، وجواها text. وهنا هنحط الـ output اللي طالع من الـ AI Agent node. كده الرد حيتبعت.
بعد ما نعمل save لكل حاجة ونبدأ نجرب، الشخص يدخل على صفحتك ويكتب رسالة. الرسالة حتستقبلها N8N عن طريق الـ webhook. حتترجم وتديل الـ AI agent. الـ AI agent حيعمل عليها معالجة ويرد بناءً على تعليماتك. ورد الـ AI agent حيتبعت عن طريق الـ HTTP request للمسينجر تاني ويوصل للشخص. وانت مش محتاج تفتح المسينجر خالص.
مواضيع ذات صله
باختصار هو ده ملخص خطوات ربط المسينجر ب N8N وعمل رد آلي باستخدام AI agent. الأهم إنك تفهم دور كل نود، الـ webhook علشان الاستقبال، والـ AI agent علشان المعالجة والرد، والـ HTTP request علشان الإرسال تاني. ممكن لو ما فهمتش اول موضوع صعب عليك شوف الفيديو ده شرح بالتفصيل 👇
تعليقات: (0) إضافة تعليق
ادعمنا بدعوه اصدقائك للموقع